初嘗平價法式牛扒店 La Vache!

早前曾經聽聞中環荷里活道附近開左間新嘅法式牛扒店，有人話佢抵食到爆，亦有人話佢無得揀...
愛牛嘅我當然唔會放過，立即喺whatsapp 到召集為食團團友出黎享受一下啦

由於為食團團友主要都係同事，而我班同事都係輪班工作。為求盡快可以成團，所以今次牛牛為食團一於向午餐時段出發! 上官網睇佢話要五位或以上先可以訂位，而咁啱我地今次又有5個人，都係訂定位安全啲!

門口除左有La Vache! 之外，
仲有一隻牛，非常易認

聽電話o既係外藉職員，要以英語溝通，職員有禮地介紹午餐包埋甜品及加一服務費，短短幾分鐘訂坐對話都已經感覺到職員好友善，令我更加期待呢一個牛牛午餐!

到左當日下午，我地五個大男人浩浩蕩蕩咁黎到荷里活到同卑利街交界，最令團友印象深刻就係街口嘅公利蔗汁。街口轉入卑利街行左幾十步就到達La Vache! 門口啦。坐低無耐服務員就遞上Drink list同埋冰凍嘅tap water，然後職員就問我地係唔係第一次黎La Vache，然後就簡單介紹左佢地間餐廳比我地知認識，最後就問我地 how you'd like your steak cooked? 我地其中一個團友其實想要 rare，不過費事麻煩之下就全部都要medium rare，而職員亦立即係餐紙上寫上「M.R.」作記認。

餐廳中間位置係酒吧，食完牛扒
仲可以同朋友飲返幾杯先

店內環境優雅寧靜，雖然當時係午餐時段，但人數唔算多，相信係地點偏僻同埋價錢對午餐黎講都唔算平民。四周圍望下都可以見到唔少巴黎同倫敦名勝嘅畫作。聽聞呢間餐廳係參照巴黎嘅Relais de Venise L'Entrecote餐廳嘅概念，專係提供單一菜式，咁樣佢地就可以提供更加精美嘅食物比我地嘆啦！

其實之前都去過類似嘅餐廳，仲記得當年去London 人氣餐廳 burger and lobster 都係專門提供指定菜式，不過burger and lobster 就起碼都有steam or grill lobster, burger 同埋lobster roll 比你揀；仲有一樣相似嘅就係人少無得訂位，La Vache 要起碼五個人先有得訂。


Order 落完之後馬上送上嘅就香噴噴嘅法包同埋牛油。牛油上有一塊紙蓋住，打開之後牛油嘅香味即刻散發出黎。呢隻香味可以話係膻味，但我覺得係好香好吸引嘅膻味，據了解啲牛油同法包都係由法國直送到香港，唔怪得之咁正啦。唔好講咁多，一手拎起暖立立嘅麵包，再毫不留手咁將軟軟嘅牛油搽係麵包上，再黎個反手一口咬落去... 外脆內軟呢四隻咁行嘅字都形容唔到，因為再加埋半溶嘅牛油係鬆軟嘅麵包，感覺真係唔想停。

你話死唔死，淨係法包都可以令我地咁受驚，一陣塊牛扒黎到你話點算呢? 哈哈

好在，當我地正在為個法包瘋癲之時，沙律亦都剛剛送到。沙律係由牛油生菜配輕輕烤過嘅合桃同埋櫻桃蘿蔔片，醬汁方面有olive oil同芥末混合而成。可惜olive oil 方面有啲油益味，有少少影響到個味道。不過都好欣賞佢用牛油生菜，呢隻菜嘅菜葉比較厚身，食落好嫩滑鮮甜，再加埋脆脆嘅合桃同酸酸地而且唔會過多嘅醬汁的確係幾醒胃。

食完沙律無耐，職員就拎左幾個金屬架過黎，亦即係話比你知你嘅牛扒將會好快送到!! 果然，係幾分鐘之後，兩隻銀碟載住5塊10oz 嘅 US Prime Rib eye 送到啦。一放上金屬架上就用微火座熱以保持溫度，然後職員就會將一半嘅牛扒放到你嘅碟上。

當牛扒分好之後，另一位職員就拎住兩碟滿滿嘅薯條過黎再分比我地每一碟，最後再送上牛扒醬汁同配薯條嘅蛋黃醬，齊曬主菜咁我地就可以開動啦!!



牛扒方面係10oz 嘅 US Prime Rib eye，每件大約一吋厚，職員話佢地好簡單用牛油同黑椒醃過下，到燒果陣再落鹽。La Vache 嘅牛扒睇起上黎比較黑啲，因為佢係用明火黎燒。雖然外面睇塊扒嘅顏色好似好深色咁，但原來入面都係剛剛好medium rare，粉紅色而且帶少少血! 火喉控制得好之餘切開果陣拉刀果下係feel唔到牛扒的肌肉纖維嘅爭扎 (可能係把刀夠利...) 隨牛扒送上一個類似Bearnaise 嘅house sauce，加左蛋黃醬、白醋白酒同香草。不過我緊係唔用個醬住啦，原汁原味放一舊入口先! 我都未試到牛扒個味，身邊嘅朋友仔已經開始講「哇，好正呀」...咬落去，鮮嫩多汁呢個就堅係啦，最重要係非常濃嘅牛肉味連同燒焦嘅香味真係好夾，香味已經直達我味蕾深處；而咬開牛扒果陣只需輕輕力就可以，但絕對唔係鬆肉粉嘅功效，可見牛扒本身係幾咁靚。食第二件果陣我就試下加埋個house sauce，個house sauce嘅少少酸的確係可以將個牛味提升，不過我就比較享受塊扒本身嘅牛香。雖然廚師已經將塊扒中間嘅脂肪切走，但佢仍然有少少燒焦左嘅油脂香氣，不過如果用左house sauce 就可能會被白醋遮蓋左呢種油脂香氣啦。順帶一提，除左house sauce 之外，呢到都有English mustard提供。

食左幾件牛扒，咁就食下香噴噴嘅薯條。金黃色嘅薯條除左有好香嘅薯仔味，仲有牛油味。點解？因為呢到嘅薯仔係用牛脂提煉嘅牛油黎炸。之前我都聽過某間steak house 係用鴨油炸薯條，而且仲要炸三次確保香脆。La Vache 有無炸三次薯條我就唔知，不過佢都炸到啲薯條幾挺身，而且咬開薯條中間仍然係薯蓉般嘅質感。錯誤地將薯條點左少少牛扒嘅house sauce，點知原來味道都幾夾，自此我就將薯條同house sauce 拼埋左啦哈哈哈

可能你地會笑我，但我真係好鐘意呢到嘅薯條，我食完牛扒之後都refill 左三次薯條，而我都留意到每一次refill 薯條果陣都要等一陣同埋送上時係熱辣辣，職員解釋薯條係每次知道要refill 嘅時候先去炸，唔怪得咁正啦。

雖然話呢間餐廳全日都係同一個收費，但係午餐時間係會送甜品的，晚餐時間就要另外order啦。今次送上嘅甜品係vanille ice cream profiteroles (雲呢拿雪榚配奶油巧克力小圓酥餅) ，送上果陣成碟當然係冷冰冰啦，但原來佢之後會幫你淋上熱朱古力醬上去中間塊朱古力上面，之後塊朱古力就會好似靈芝咁係中間向下溶。下面有三粒用泡芙包住嘅雲呢拿雪榚同合桃碎，每一啖入口前都集齊碟上各種食材就可以充分感受到成個甜品配搭嘅奧妙。軟滑平淡嘅雲呢拿雪榚加上香濃朱古力，泡芙平衡左個口感同甜味，但最後仲有脆脆嘅合桃碎... 唔駛我講，你自己幻想下 ^ ^

呢一餐好滿足，無論係牛扒定薯條定係其他食物都質素都好好！只提供一種食物嘅餐廳有性格亦有實力，係質素嘅保證。愛牛嘅我係唔會放棄架！ 我會繼續搵更加正嘅牛扒！睇住黎啦！

是次用餐消費$258+10%

始終與日本烏冬都是有一段距離

早前香港掀起一陣拉麵熱潮，但好多人食完之後都投訴無論間舖係咪日本人打理，個店名有幾正宗都好，都食唔返係日本果種麵質同味道。其實唔只拉麵，烏冬都係一樣呀陰公。

其實拉麵同烏冬都係d好cheap o既食材，但就唔知點解係香港比人賣到貴一貴，不過都仲有人肯排幾個鐘去食百幾蚊碗麵。 今日我想講o既丸龜製麵就係其中一間我認為價錢合理，質素都叫唔錯o既烏冬店。

丸龜製麵係日本一間都幾出名o既連鎖烏冬品牌，香港分店係由一間叫和心o既本地飲食集團引入。佢出名在即場自製讚岐烏冬，再加上佢幾款配搭每份大約都係27蚊至50蚊，呢個價錢都算合理丫。

以往要食丸龜都要係九龍先至有，今時今日終於唔駛再過海都有得嘆。因為丸龜太古店已開。對於我呢個港島人黎講係一件非常幸福o既事。係丸龜o既烏冬有分三大種 - 濃口醬油、湯烏冬同埋拌烏冬 (鰹魚醬油)。另外仲有咖哩飯，咖哩烏冬同埋飯糰。

今晚早左收工，八點唔夠就走左啦! 搭車去到太古忽然心血來潮就落左車，諗住去剛剛裝修好o既apita 行一陣。
新裝修o既apita food court 加入左幾間新o既食店，丸龜係其中一間。我今晚就order 左溫泉蛋烏冬追加牛肉牛蒡。


丸龜有佢獨特o既落order 方法，首先走埋去同店員講你要o既烏冬，之後你就會見到師傅立即幫你煮麵同過冷河。之後再為你加上你指定o既配料，除左餐牌上指定配料之外佢仲有幾款天婦羅可以揀。但我為左食得低脂，所以一款天婦羅都無揀到。係落order o既過程入面你係可以完全睇到曬搓粉，壓麵，切麵同煮麵過程，百份百現場製作。

揀完配料就可以取麵同比錢。講真，比你見到佢好似好勁咁現場製麵，對佢o既信心當然會大左好多。但係呢d都可以係假象，真係好唔好食就要食入口先至知啦。之前係其他分店食烏冬都有免費凍水供應，十足十日本麵店一般做法，但可能太古店係food court 入面，受到百貨公司限制所以太古店無免費水供應。

一埋到位就即刻食烏冬，可惜烏冬麵質好硬，但肯定唔係未煮熟而係質地問題，硬得黎唔彈牙，完全感受唔到係日本當地任何一間平民麵店的質素，但相比香港多間我已試過o既麵店黎講都已經算唔錯。筷子夾起烏冬時可見雪白o既烏冬已經充分沾上薄薄的一層啡色醬油，而且仲緊緊的掛係烏冬面上，入口味道,不會太咸。呢款醬油係比較濃味，o係餐牌上早已提醒濃醬油只用於沾味到烏冬上，所以我都無當湯飲。另外牛肉煮得好林好入味，味道偏甜亦都好開胃! 呢個配搭我認為非常good呀~!

雖然麵質仍然未乎合我o既要求同滿足我o既日本回憶，但都已經好過其他入口即溶o既烏冬架啦，有人話想試烏冬夠唔夠彈牙就要試凍烏冬，不過丸龜o既凍烏冬我都食過，一樣係咁硬... 所以都係有待改善吧  (或者係我唔識欣賞吧! 係我口味有待改善...哈哈)

健康之選 華御結

又要去金鐘覆診啦！
次次等呢個醫生都等成個鐘，未食lunch真係餓死人。

今日又係咁等，餓得滯就飛落樓下搵野食
早前已得知華御結係sell健康飲食，一於就揀佢啦。

佢有手卷，便當，沙律同其他日式食物。份量比較細但勝在有得揀。係價錢牌上都有標明每份食物嘅卡路里，另外食物包裝上亦有提供完整而準確嘅每份量食物營養標籤。對於講求健康嘅我真係一大喜訊。

今次我揀左煙三文魚沙律，入面除左沙律菜，蕃茄仔之外仲有薯蓉同煙三文魚兩大片，但我唔見有粟米青瓜同露荀。沙律醬有三款 - 凱撒，芝麻同醋，不過我三款都唔揀，就咁食。

唔落醬食沙律好似好難頂，其實食慣左就發覺新鮮嘅菜係好甜，另外可以嗒真啲每樣食材嘅味道，真係唔錯啊！

如果係我返工返學附近都有呢間野就好啦！之前我成日都覺得pret a manger已經好健康，但呢間仲正，正在有營養標籤...就係咁簡單。

很努力的模仿英式餐館，我知你很努力了

今日下午兩點要去金鐘覆診，訓到最後一刻先起身飛出門口是常識吧。

早餐都未食，等見醫生等左65分鐘，見到醫生坐低急口令講出情況，唔夠2分鐘就叫你出去搵姑娘約下次覆診，再等多20分鐘左右拎埋藥就可以放低20蚊走人

沒錯，呢個就係我公司醫療卡所享用o既醫療服務。

講返正題，一起身就過左兩個鐘趕急o既節奏，難得今日放假就要去放鬆一下。

我知道金鐘有好多正野，要嘆的話JW 萬豪、港島香格里拉、太古廣場甚至灣仔日月星街果邊都有唔少cafe同餐廳可以嘆下美食同下午茶。

但我想食早餐喎...邊到有早餐可以滿足到我? 我平時係金鐘食開元氣、四季(唔係酒店，係一間本地日式茶餐廳)，金鐘廊入面間高級美心快餐simply life或者一風堂同埋海富中心一樓某幾間三文治店。但我今日真係唔想食呢d，我淨係想食早餐啊!

咪住，好似有間野叫brick lane，佢話到自己好英式架，就去睇下佢有無早餐食先。

行過長長天橋，經過冷冰冰的政府總部，終於黎到brick lane 門口。

我企左係門口數分鐘，只見有數名待應正在接受上司指導而未有人打算招呼我，

直到我開聲先有人出黎招呼我坐低，舖頭入面無其實食客，我見天氣咁好就坐左係戶外露台曬太陽嘆早餐嚕~


坐低之後好快就叫左all day breakfast (every thing) 即係有兩隻你想佢點煮都得o既蛋、煙肉、焗豆、芝士、火腿、薯餅、大蘑菇即係Portobello Mushroom、煎番茄、香草豬肉腸、煙三文魚同多士，另外再加左份Black Pudding即係豬血腸。

回味當日在英國的正宗早餐

講起英國o既早餐，我就諗起我當日第一次去英國，到左london 之後第1日就自己一個走落街搵野食，唔知頭唔知路咁行行下就去左borough high street見到有間平民餐廳叫Nelsons's ，入到去叫左個full english breakfast，黎到見到佢大份到真係嚇左一跳! 兩塊薯餅，兩塊煙肉，兩隻蛋大量焗豆同大量蘑菇，另外再有4塊多士

最初我以為呢份已經係最誇張，原來都未算，另外仲有一份叫Builder’s Breakfast係仲勁! 除左有以上各樣食物之外仲有大量薯條!! 諗起呢份正宗英國早餐，我果陣真係食到連lunch 都唔駛食。我一路坐係到等份早餐一路充滿期待同回味當日係london 份超級早餐。







發左陣白日夢份早餐就送到啦，隻碟都已經細過英國果份好多啦，真係有d失望。

但睇下入面有咩食先啦。炒蛋都算大份，而且炒得好滑! 不過佢應該無出貓加奶或cream加少少鹽花之後味道剛剛好而且蛋味都好實在。滑蛋配多士都唔錯，就拎起件多士聞下佢 (係，我慣左放野入口前聞一聞)

多士上面有少少乾左o既提子，另外聞落有好香o既蒜味，呢隻蒜味並唔係牛油蒜蓉果隻香，而係用生蒜直接磨落去已經烘乾o既多士上面留有o既香味!! 呢隻手法好少有人用，因為都要磨多好幾次先做到有濃郁香蒜味o既效果。將炒蛋放上去蒜香多士上面，再加少少芝士，食落去口感同味道好豐富。可惜外脆入軟o既多士只有一小塊，幾啖就嘆完。

薯餅都炸得幾好，起碼唔會連入面d薯仔肉都炸乾。唔係講笑，真係有人做到成舊薯餅都脆曬，真係高手黎架。

Black Pudding 其實係豬血同豬肉混合而成之後再灌入腸夜成為血腸，不過佢整得比較鬆散影響口感。入口味道唔腥，我平時唔食豬紅都可以接受得到! 煙三文魚同煙肉比較普通，而香草豬肉腸入面真係有香草，唔係敷衍你的。一條條香草係d肉入面，非常醒味。但腸衣同血腸一樣係好軟，令到豬肉腸o既質感同樣好鬆散。

不過佢真係用超級多油去煎呢份早餐，番茄同大蘑菇輕輕煎過，所以都係油林林的。雖然食得all day breakfast 都預左佢油膩，但都唔係真係多到咁誇張掛。

食到最後係沙律菜，佢係沙律菜上加左橄欖油，令平淡o既沙律菜加左一d 香味，但食到比較底d o既菜果陣，開始已經食得出菜上面o既唔橄欖油，而係隔離d煙肉同香腸o既油啦。
到最後都比我食曬成碟，講真食完好似無乜飽o既感覺。但望一望隻碟上面o既油就真係令我非常有罪惡感... 至於你話抵唔抵食 - 唔係講價錢上抵唔抵，而係講脂肪同食物比例上...大家應該心中有數吧。

始終都唔係英國，食唔返英國o既感覺都好正常，正如我係英國食文興酒家時，燒味飯的味道都有點西餐味一樣。

算啦，過下癮都ok o既!

豬肉腸較為鬆散，影響口感。但勝在有香草配搭，味道加返d分比佢。

真係多油得滯，雖然預你都係多油，但都唔駛多得咁緊要o既

店內環境不錯，可選室內或戶外用餐

係The Pudding 入面無人食pudding，咁食乜?

那次happy friday night 同幾位朋友完成左神聖活動之後就去食甜品吹下水，今晚朋友B 出動左佢嘅私人座駕載我地出發！

上到車之後大家話不如去大坑。大坑近年多左好多中價至貴價食肆，但傳統老店就買少見少。自從2013年10月我最愛嘅肥媽 光華士多關門後，我好似都已經無再落大坑食野啦。

既然咁耐無去，就一於去大坑望下而家搞成點啦。

落車之後，大家行到 布朗街 同京街交界，見到小甜谷已爆，Lab made又排曬隊，朋友仔話不如去康記食粥...都好喎! 果晚得十度左右，食粥暖下胃都幾好架! 但大家又忽然發現有間野叫做 The Pudding - Nouveau，朋友仔話呢間野之前淨係叫 The Pudding， Nouveau係未見過嘅，至於有咩分別呢? 唔好理啦，一於入去試試先啦!

舖面好細，大約只有6張檯左右但佢都有放幾張擺街邊，裝潢睇落簡單以黑白色為主。開放式水吧可以睇到甜品準備過程，雖然環境狹窄但感覺仍然舒適。





 The Pudding - Nouveau 唔只賣甜品，佢亦有各種coffee，all day breakfast, croissant 同eggs benedict 等熱食，不過有時限! 夜晚8點後就只有甜品啦。

坐低之後睇下menu，餐牌主要分為五大類- waffle，yogurt，特色甜品，刨冰及意式煙燻奶凍 Smoked Panna Cotta，另外仲有幾款特色飲品。服務員同時亦有禮地表示唔會再有Yogurt 供應。

睇menu 最興就係話圖片只供參考，睇下d 相又真係影得幾靚，搞到大家都有d 間歇性選擇困難...

我就當然抱住一個測試心態，一於就睇下佢個Apple Crumple 做成點先! Apple Crumple有幾個考手功之處：第一當然係佢煮蘋果嘅手勢，第二就係佢Crumple 部份搓得如何。另外朋友仔就order 左 lemon parfait, souffle 同埋另外兩杯特飲。

等食物出現期間，我就手痕上網搵下關於呢間小店嘅資料，最後得知原來佢係under 一間叫 Lassana concept Limited，Lassana concept係由本地一班飲食界專家而開嘅公司，旗下有 Cafe Spade by Lassana 以及 Express Bar by Lassana，主要都係賣甜品同咖啡。
咦?! 咁係咪連鎖店?! 會唔會連d 食物都係copy and paste，毫無靈魂可言?! 諗多左，驚一驚... 無幾耐野食就黎到啦!


估佢唔到竟然係Apple Crumple率先到場，睇落crumple 色水比較深，雲呢拿雪糕球上被灑上少許焦糖漿，另外再加上浸過糖水嘅焗蘋果片同薄荷葉。成個presentation 攞曬分，但食落係點呢? 各位朋友仔一齊開動啦，齊齊分享一齊比d 意見啦喂

正如我早前提過，我係雲呢拿雪榚嘅fans，我今次亦唔例外先試雪糕球。cream 嘅奶香鮮味充足而且唔會死甜，入口溶嘅速度比較快，加上慢慢散發嘅Vanilla 味...我即刻望清楚d 先!! 咦! 有Vanilla seed!!! 咪住，究竟佢係咪大牌子嘅現成雪糕定係自家製呢?! 我馬上轉身問下店員，店員自豪地回答：「雪糕係我地自己整架」

wow! 真係估佢唔到。

試完雪糕就繼續食落去，crumple質感比較乾及散，似乎是over bake左。因為我預期佢個質感係比較濕潤但係粒粒分明。對於呢個質感，淨食好似感覺麻麻地，一於連埋蘋果一齊食。蘋果加左黃糖、肉桂粉及荳蔻粉一齊煮，甜度適中，連埋crumple一齊食嘅感覺都仍然覺得比較乾身，最後將雪糕，crumple同蘋果一齊食，味道同口感終於似樣了!  因為雪糕嘅甜同濕潤加上較乾身crumple 及不太甜嘅蘋果，層次感立即出現曬。

試完Apple Crumple，送上嘅就係lemon parfait。我本人好鐘意食檸檬批，記得初訪英國時女友帶我去borough market食完街頭小食後我都唔放過同場嘅lemon pie，好酸不過同甜味剛好balance，呢個味道我永遠都記得係幾咁醒神同清新。 今晚個lemon parfait同menu 圖片堅係有分別喎... 少左個拉糖花裝飾！ 我覺得好重要架，因為拉糖花都要少少技巧，亦都好影響成個presentation，少左個糖花，成個product 即刻平面曬... 扣分。

我記得英國電視節目Baking Mad 入面嘅甜品大師Eric Lanlard曾經講過：「放係碟上嘅所有items 唔應該只係for presentation，仲應該係有佢嘅作用。」

今次碟上面有raspberry(覆盆子)，另外有raspberry sauce...所以我決定先試一啖係無sauce，睇下佢個lemon cream cheese 打成點先，然後再連埋raspberry sauce品嚐佢本身個設計。

Lemon cream cheese打得唔錯，檸檬酸味適中，唔會嚇怕非檸檬愛好者。加上質感企身得軟滑，配上微暖且鬆脆嘅酥皮，raspberry 嘅果汁中和返個配搭...我都幾鐘意! 之後再加埋個raspberry sauce，可以令到檸檬酸同覆盆子嘅甜係口腔入面撞黎撞去，幾有趣嘅味覺。

最後送上就係Vanilla souffle，Vanilla 味充斥住成張檯，而且焗得好高，證明打得足夠空氣入內。souffle頂微微焗焦部份特別香口，可以同下層比較輕身嘅部份成一個對比，要分開黎食。對於呢個souffle我就無乜評語，因為我自己本身對souffle 興趣不太大。但佢唔會太甜同膩係我欣賞佢之處。

大家努力食完三款甜品後，服務員都有主動為我地提供清水，雖然店內環境比較狹窄，但服務員仍然有禮及盡力為我地服務值得一讚，而且仲無趕我地走，由得我地慢慢傾計。

傾計期間我亦都留意到大部份甜品都係由店內年輕師傅即場製作，唔怪得質素都不錯。我早前所擔心嘅連鎖店食物質素可以鬆一口氣了。

霞飛 上海 將軍

自從被調到將軍澳開工後，飲食方面對我黎講又係一個新煩惱，皆因舊時係杏花邨可選擇嘅放飯地點唔多，商場各名店又貴又唔好食，加上要乎合營養師指示嘅餐館更加少之有少 ，諗都唔駛諗，晚晚都係去同一檔就可以醫飽個肚。

上兩星期到埗後曾經四處尋覓健康餐（油雞燒肉飯走汁）嘅代替品，但講真效果都唔太理想。適逢今日年初四，要我返工所已經sad到爆，仲要我搵似樣嘅燒味飯真係無乜心機。

忽然想起不如叫埋呀爸呀媽黎一齊食飯丫，橫掂佢兩個今晚都係出街食。上去開飯網左搵右搵，最後揀左霞飛點心拉麵。呀爸話食小籠包都好喎。

準時放meal break就一個箭步飛去搵已坐低睇緊menu嘅爸媽，我地order左餐前小食醉雞，小籠包，鱔糊炒拉麵，煎牛肉餡餅同埋上海炒年榚。

由於大家非常肚餓，相都影唔切就已經開動左...唔好意思啊大家! 講到醉雞，可能問十個人會有十種唔同嘅要求或期待，口味嘅野真係好難講。霞飛嘅醉雞溫度適中，唔會雪到結冰亦唔會暖住送上（無吹水的，兩個情況都遇過）而醉雞汁有香濃花雕及唔會過甜，不過呷過一啖後都怕一陣吹波仔會超標。

小食醉雞比我地印象都唔錯，之後送上嘅有鱔糊炒拉麵同小籠包。聽過有人話小籠包開蓋後要rest一陣直至無煙先好食，所以就試左膳糊炒拉麵先啦。

鱔糊炒拉麵

叫得炒麵就預左油膩，不過佢個醬油同黑醋比例混合得好好，酸甜適中消除左油膩口感，而且唔會有多餘嘅汁留係碟上。

鱔糊汆水時間掌握得ok，每一條鱔都好爽口而且唔會痴埋一舊舊。韮王未有過量，我最怕食拉炒麵時有過量嘅蔥或芽菜等...

小籠包-皮薄但無味

到小籠包啦，見佢香噴噴，自然好心急想食啦，但係經驗話比我地知，對小籠包心急嘅下場多數係好淒慘...所以要慢慢係個頂到夾起佢。我慣左唔點醋，我比較鐘意原汁原味，放上匙羹上面，小心翼翼咁咬開佢先！

老實講，呢到個小籠包我覺得一般咋，佢皮唔算話真係好薄，咬開時肉汁雖然相當多，但係肉味及調味欠奉。三個人食四個小籠包...我食一個就夠，完全無慾望想食埋淨低果個。

煎牛肉餡餅 - 又係無味

煎牛肉餡餅送到，上檯時餅皮一啲都唔覺油，而且熱辣辣看似吸引。食完小籠包後有點失望，再見到個金黃色嘅牛肉餅就即刻醒一醒，再次好小心咁去品嚐呢一類嘅爆汁美食。

真係可惜，佢同小籠包一樣無味，甚至乎我比多最後一次機會佢去嘗試聞下肉餡有無牛肉香味...結果同樣令我失望。我相信北角馬寶道德興隆賣緊四蚊一件嘅煎牛肉包會比佢做得更出色。


最後送上嘅係上海炒年榚，加入左冬菇絲、肉絲、黃芽白同白菜。年榚軟硬適中，可以意大利文al dente黎形容，即係外軟內煙韌但唔會黏牙。食完之後碟上都無多餘油出現，都算合格啦。

上海炒年榚 - al dente

總括今晚晚餐，食物質素好壞參半，醉雞的確令人相當醒神，但小籠包同牛肉餅就真係比較失望。 相信以後係將軍澳返工嘅日子，若果要再食上海菜，霞飛都可以放得比較後一啲啦，因為隔離商場有間質素比較穩定嘅連鎖上海菜品牌可以選擇。

甜品屋內的的奇怪男人聚會

年三十晚，同屋企人食過團年飯，坐埋一邊食水果。無聊間拎起手機就順便問下班小學雞有無人出黎食糖水聚下一齊蛇過馬年。

點知覆機嘅只有男同學! 唔緊要，出左黎先算。

三個男人約左係西灣河等，講到食糖水，西灣河數埋唔係明記就甜嫂，再唔係就太安樓入面嘅老牌糖水。之前教會朋友經常幫襯嘅四季就聽聞於早前已經結業，原址開左新店甜甜屋
，求求其其之下就同兩位好兄弟入左去坐低。

呢間舖有提供較為特別嘅盤栽甜品，但我地今次order 嘅就係比較普通嘅Blue Burberry Cheesecake 加雲呢拿雪榚，另外一位兄弟就揀左焦糖香蕉窩夫加雲呢拿雪榚，一於試下佢嘅甜品基本功。